Ի պատասխան Hetq.am կայքում 04.05.2020թ. «Ալկոգելերն ու ախտահանիչ միջոցները չեն փորձարկվում և գրանցվում են օրենքի խախտմամբ՝ որպես կոսմետիկ միջոց» և 07.06.2020թ. «Հայաստանը սխալ է գրանցել «ալկոգելերը» ԵԱՏՄ պատասխանը» տպագրված հրապարակումների` հարկ ենք համարում ընգծել, որ դրանցում լրատվամիջոցի կողմից ներկայացված պնդումները ճշգրիտ չեն արտացոլում իրականությունը և պարունակում են մի շարք տարընթերցումներ.

Ինչպես նախկինում արդեն նշել ենք, 330499 ԱՏԳ ԱԱ ծածկագրին դասվող մաշկի խնամքի միջոցները, անկախ նրանից օժտված են հակաբակտերիալ հատկությամբ թե՝ ոչ, ՄՄ ՏԿ 009/2011 «Օծանելիքա-կոսմետիկական արտադրանքի անվտանգության տեխնիկական կանոնակարգ»-ով համապատասխանության հայտարարագրման օբյեկտ են, ինչը փաստում են նաև Եվրասիական տնտեսական միության հանձնաժողովի կողմից տրված խորհրդատվական բնույթի պարզաբանումները (մեջբերում՝ «… հաշվի առնելով վերոգրյալը, կարծում ենք, որ հակաբակտերիալ հատկությամբ օժտվածմաշկի խնամքի միջոցները կարող են հանդիսանալ օծանելիքա-կոսմետիկական արտադրանք, որի վրա տարածվում է ՄՄ ՏԿ 009/2011») և ԵԱՏՄ անդամ-պետությունների կողմից միասնական ռեեստրում հարյուրավոր համապատասխանության հայտարարագրերի գրանցման փաստը:

Hetq.am-ի 07.06.2020թ. «Հայաստանը սխալ է գրանցել «ալկոգելերը» ԵԱՏՄ պատասխանը» հոդվածում նշվում է. (մեջբերում՝ «… ՄՄ ՏԿ 009/2011- կանոնակարգի 4-րդ հոդվածը սահմանում է, որ տեխնիկական կանոնակարգի կարգավորման առարկա հանդիսացող ապրանքը պետք է համապատասխանի դրա բոլոր պահանջներին…»), ի գիտություն լրատվամիջոցի հայտնում ենք, որ ՄՄ ՏԿ 009/2011 կանոնակարգի ոչ թե 4-րդ, այլ 5-րդ հոդվածով են սահմանված օծանելիքա-կոսմետիկական արտադրանքին ներկայացվող պահանջները:

Համապատասխանության հայտարարագրի գրանցման ժամանակ ստուգվում է արտադրանքի պիտակի նախագծի վրա կատարված մակնշումը, բաղադրակազմում օգտագործվող նյութերի համապատասխանությունը տեխնիկական կանոնակարգով թույլատրված նյութերի ցանկին: Փորձարկումներն իրականացվում են համաձայն տեխնիկական կանոնակարգով նախատեսված ցուցանիշների (20%-ից ավել սպիրտ պարունակող կոսմետիկական արտադրանքում մանրէաբանական ցուցանիշներով փորձարկում չի նախատեսվում): Արտադրանքի հետագա որակի և մակնշման խախտման պատասխանատվությունը կրում է արտադրող ձեռնարկությունը:

Լրատվամիջոցը, ներկայացնելով Եվրասիական տնտեսական հանձնաժողովի պարզաբանումը, հայտնում է, (մեջբերում՝ «Պետական գրանցման ենթակա ապրանքների ցանկը հաստատված է Մաքսային հանձնաժողովի 2010թ․ մայիսի 28-ի N299 որոշման մեջ, որը ներառում է 6-րդ կետը՝ «Ախտահանիչ, միջատասպան, կրծողասպան միջոցները»՝ կենցաղում, բուժիչ-պրոֆիլակտիկ հաստատություններում և այլ վայրերում»): Մեկ անգամ ևս հարկ ենք համարում նշել, որ  ձեռքի ախտահանող միջոցները կանոնակարգված չեն և ենթակա չեն պարտադիր հավաստման (N 299 մաքսային միության որոշումը այդ արտադրանքի վրա չի տարածվում): Վերոնշյալ որոշմամբ ենթակա պետական գրանցման օբյեկտ են այն ախտահանիչ միջոցները, որոնք օգտագործվում են կենցաղում, բուժ հաստատություններում և այլ տարածքներում:

Զանգվածային լրատվության միջոցների մեր գործընկերներին ևս մեկ անգամ առաջարկում ենք հոդված հրապարակելուց առաջ պահպանել հրապարակման բազմակողմանիությունը, խորհրդակցել իրազեկ մասնագետների հետ, որպեսզի հանրությանը ներկայացվի ամբողջական և ճշգրիտ տեղեկատվություն: